విజయ్ సేతుపతి, జయరామ్ హీరోలుగా నటించిన మలయాళ సినిమా ‘మార్కొని మతాయ్’. సనల్ కలతిల్ దర్శకత్వం వహించారు. ఫ్యామిలీ ఎంట‌ర్‌టైనర్‌గా రూపొందిన ఈ సినిమా అక్కడ మంచి విజయం సాధించింది. అతి తక్కువ సమయంలో తమిళంలో కథానాయకుడిగా, నటుడిగా మంచి పేరు తెచ్చుకున్న మలయాళంలో నటించిన తొలి చిత్రమిది. తెలుగు ప్రేక్షకుల ముందుకు ‘రేడియో మాధవ్’గా ఈ సినిమాను తీసుకొస్తున్నారు లక్ష్మీ చెన్నకేశవ ఫిలిమ్స్ అధినేత, నిర్మాత కృష్ణస్వామి. ఈ సినిమా తెలుగు వెర్షన్ ఫస్ట్ లుక్‌ను బుధవారం హీరో శ్రీవిష్ణు విడుదల చేశారు. అనంతరం శ్రీవిష్ణు మాట్లాడుతూ.. ‘‘విజయ్ సేతుపతి గారు నటించిన ‘రేడియో మాధవ్’ తెలుగులో అనువాదం అవుతున్నందుకు చాలా సంతోషంగా ఉంది. దర్శకనిర్మాతలకు ఆల్ ది బెస్ట్. ఈ సినిమా తప్పకుండా సక్సెస్ అవ్వాలని మనస్ఫూర్తిగా కోరుకుంటున్నాను’’ అని అన్నారు. నిర్మాత కృష్ణస్వామి మాట్లాడుతూ.. “మా సినిమా ఫస్ట్ లుక్ విడుదల చేసిన శ్రీవిష్ణు గారికి స్పెషల్ థాంక్స్. మా సంస్థ రెండో చిత్రమిది. ఇంతకు ముందు దుల్కర్ సల్మాన్, సాయి పల్లవి నటించిన ‘హే పిల్లగాడ’ విడుదల చేశా. ఇప్పుడు ‘రేడియో మాధవ్’ను తీసుకొస్తున్నాను. ఈ సినిమాలో విజయ్ సేతుపతి హీరోగా కనిపిస్తారు. తన నిజ జీవిత పాత్రలో ఆయన నటించారు. ‘భాగమతి’లో విలన్‌గా, ‘అల వైకుంఠపురములో’ చిత్రంలో తండ్రిగా నటించిన జయరామ్ ఈ చిత్రంలో మిలటరీ నుంచి బయటకి వచ్చి బ్యాంకు సెక్యూరిటీ గార్డ్‌గా పనిచేస్తూ ఉండే పాత్ర పోషించారు. ఎఫ్.ఎం. రేడియో స్టేషన్ బ్యాక్ డ్రాప్‌లో నడిచే ప్రేమకథ ఈ ‘రేడియో మాధవ్’ సినిమా’’ అని అన్నారు. తెలుగులో మాటలు, పాటలు రాసిన భాష్య శ్రీ మాట్లాడుతూ.. ‘‘తెలుగులో వెంకటేష్ గారు నటించిన ‘రాజా’, ‘సంక్రాంతి’ తరహా మ్యూజికల్ ఫ్యామిలీ ఎంటర్‌టైనర్ ఈ సినిమా. మలయాళంలో పెద్ద విజయం సాధించింది. తెలుగులోనూ మంచి విజయం సాధిస్తుందని ఆశిస్తున్నాను. ఎంజాయ్ చేస్తూ చేసిన డబ్బింగ్ సినిమా ఇది’’ అని అన్నారు. విజయ్ సేతుపతి, జయరామ్ సహా ఆత్మీయ రాజన్, పూర్ణ, నరేన్, అజూ వర్గీస్ తదితరులు సినిమాలో నటించారు.
https://ift.tt/3jG8euW taken from source:
Social Plugin