హాలీవుడ్ నటి సల్మా హయేక్ హిందూ దైవం లక్ష్మీదేవికి భక్తురాలిగా మారిపోయారు. ఈ విషయాన్ని ఆమె స్వయంగా సోషల్ మీడియా ద్వారా తెలిపారు. లక్ష్మీదేవి ఫొటోను ఇన్‌స్టాగ్రామ్‌లో షేర్ చేసిన సల్మా.. లక్ష్మీదేవి పూజించడం వల్ల తనకు కలిగిన లాభాలను వివరించారు. తాను ఏ సమయంలో లక్ష్మీదేవిని పూజిస్తానో వెల్లడించారు. ‘‘నేను నా అంతర్ సౌందర్యంతో కనెక్ట్ కావాలని కోరుకున్నప్పుడు నా మనసులో లక్ష్మీదేవిని ఊహించుకొని ధ్యానం ప్రారంభిస్తాను. లక్ష్మీదేవి తన భక్తులకు సిరిసంపదలు, అదృష్టం, ప్రేమ, అందం, మాయ, ఆనందం, శ్రేయస్సును అందిస్తుందని హిందుయిజం చెబుతోంది. ఏదేమైనా, ఆమె రూపం నన్ను ఎంతో ఆనందంగా ఉండేలా చేస్తుంది. మీ అంతర్గత సౌందర్యానికి ఆనందం అనేది ద్వారం వంటిది’’ అని సల్మా హయేక్ తన ఇన్‌స్టాగ్రామ్ పోస్ట్‌లో పేర్కొన్నారు. అంతేకాదు, ఈ మెసేజ్‌కు కొనసాగింపుగా స్పానిష్‌లో మరో కామెంట్ చేశారు. ‘‘నాకు ఒక దేవుడు మాత్రమే ఉన్నాడు. కానీ, మంచి ఉద్దేశంతో చెప్పే ప్రతిదాన్ని నేను నమ్ముతాను. ఆ ఆశీర్వాలకు ధన్యవాదాలు’’ అని పేర్కొన్నారు. ఈ పోస్ట్‌కు లక్షకు పైగా లైకులు వచ్చాయి. సల్మా పోస్ట్ చూసి సోషల్ మీడియాలో ఉన్న భారతీయులు ఆనందం వ్యక్తం చేస్తున్నారు. ‘‘హిందుయిజంపై మీరు చూపిస్తోన్న ప్రేమకు ధన్యవాదాలు’’ అని ఒక వ్యక్తి కామెంట్ చేశారు. కాగా, హాలీవుడ్ నటీనటులు హిందూ దేవతలను పూజించడం కొత్తేమీ కాదు. 2019లో నటుడు విల్ స్మిత్ హరిద్వార్‌లో గంగా హారతిలో పాల్గొన్నారు. స్వయంగా గంగా హారతి ఇచ్చారు. ఈ ఫొటోలను ఆయన సోషల్ మీడియాలో షేర్ చేశారు. భగవంతుడు అనుభవాలను బోధిస్తాడని, ఇండియా వెళ్లి అక్కడున్న వర్ణాలు, ప్రజలు, ప్రకృతి అందాన్ని ఆస్వాదించాలని తన బామ్మ తనకు చెప్పినట్టు విల్ స్మిత్ పేర్కొన్నారు. అలాగే, జూలియా రాబర్ట్స్, మిలే సైరస్ కూడా గతంలో హిందూ దేవతలను పూజించారు.
https://ift.tt/3lGbfvZ taken from source:
Social Plugin